بەپێی ڕاگەیاندنی پەیوەندییە گشتییەکانی زانکۆی کوردستان، بەپێی نوێترین ئەنجامە ڕاگەیەندراوەکانی سیستەمی پۆلێنبەندیی باوەڕپێکراوی «تایمز» بۆ ساڵی ٢٠٢٦، زانکۆی کوردستان بە بەدەستهێنانی پلەی گشتیی ١٢٠١-١٥٠٠، پێگەی خۆی لەنێو زانکۆ پێشەنگەکانی جیهاندا چەسپاند.

ئەم پۆلێنبەندییە، کە زانکۆکان لەسەر بنەمای پێنج پێوەری سەرەکی هەڵدەسەنگێنێت، نیشاندەری ڕەوتی گەشەسەندن و داهاتوویەکی گەشی زانکۆی کوردستانە:

• کوالێتیی توێژینەوە (Research Quality): پێشکەوتنی بەرچاو

• پەیوەندی لەگەڵ پیشەسازی (Industry): پێشکەوتنی بەرچاو

• دیدگای نێودەوڵەتی (International Outlook): پێشکەوتنی بەرچاو

• ژینگەی توێژینەوە (Research Environment): ڕەوتی بەرەو باشبوون

• فێرکردن (Teaching): ڕەوتی بەرەو باشبوون

گەشەی بەرچاو لە سێ پێوەری سەرەکی و باشتربوون لە دوو پێوەری دیکەدا، مژدەی بەردەوامیی پێشکەوتن و بەرزبوونەوەی پێگەی زانکۆ لە ساڵانی داهاتوودا دەدات. ئەم سەرکەوتنە، کە بەرهەمی هەوڵی بەکۆمەڵی ئەندامانی دەستەی زانستی، توێژەران، خوێندکاران و کارمەندانی زانکۆیە، نیشاندەری کاریگەریی سیاسەتە ستراتیژییەکانی زانکۆیە لە ئاراستەی بەرزکردنەوەی کوالێتی، بەهێزکردنی پەیوەندی لەگەڵ پیشەسازی و فراوانکردنی هاریکارییە نێودەوڵەتییەکان.

جێی باسە، بە بەردەوامبوونی ئەم ڕەوتە، گەڕانەوەی زانکۆ بۆ پلەی خوار ١٠٠٠ لەم پۆلێنبەندییە جیهانییەدا، زۆر ئەگەری هەیە.