بەپێی ڕاگەیەندراوی نووسینگەی پەیوەندییە گشتییەکانی زانکۆی کوردستان، ئەم سەردانە لە ڕۆژانی ٢٦ و ٢٧ی تشرینی یەکەمی ٢٠٢٥ (بەرانبەر بە ٤ و ٥ی خەزەڵوەر)، لەلایەن نووسینگەی کاروباری نێودەوڵەتیی زانکۆوە ڕێک خرابوو. ئامانجی سەرەکیی سەردانەکە، بەدواداچوون و جێبەجێکردنی خاڵەکانی یاداشتی لێکگەیشتنی هاوبەشی نێوان هەردوو زانکۆ بوو.

شانده ڕووسییەکە پێکهاتبوو لە دکتۆر پاوێل سمیرنۆڤ، ڕاوێژکاری پەیوەندییە نێودەوڵەتییەکان و هەماهەنگکاری پەیوەندییە زانستی و پیشەسازییەکان؛ دکتۆر لێڤ کرێکۆتێن، ڕاوێژکاری سەرۆکی ژووری بازرگانی و پیشەسازیی ئۆڕاڵ؛ و دکتۆر مۆحسین بەگی، هەماهەنگکاری هاریکارییە زانستییەکان لەگەڵ زانکۆکانی ڕووسیا.

شاندەکە لە کۆبوونەوەیەکی فەرمیدا لەگەڵ سەرۆک و ئەندامانی ئەنجومەنی سەرۆکایەتیی زانکۆی کوردستان و بە ئامادەبوونی ژمارەیەک لەو مامۆستایانەی کە پێشینەی خوێندنیان لە زانکۆکانی ڕووسیا هەبوو، دیداریان ئەنجام دا و لەبارەی توانست و بوارەکانی هاریکاریی هاوبەشەوە گفتوگۆیان کرد. لە درێژەی بەرنامەکەدا، شاندی میوان سەردانی فاکەڵتییەکانی ئەندازیاری، زانست، زمان و ئەدەبیات، کشتوکاڵ و هەروەها سەنتەری توێژینەوەی کوردستانناسییان کرد.

لە کۆتایی سەردانە دوو ڕۆژییەکەدا، هەردوولا جەختیان لەسەر پەرەپێدانی هاریکاریی درێژخایەن لە بوارە فێرکاری، ڕۆشنبیری و پیشەسازییەکاندا کردەوە. گرنگترین ئەو تەوەرانەی کە ڕێککەوتنیان لەسەر کرا بریتی بوون لە:

• دامەزراندنی سەنتەری فێرکردنی زمانی ڕووسی لە زانکۆی کوردستان و سەنتەری فێرکردنی زمانی فارسی لە زانکۆی فیدراڵی ئۆڕاڵ بە شێوەی ئۆنلاین و بە هاریکاریی مامۆستایانی زانکۆی کوردستان.

• پێشکەشکردنی زنجیرە وتارێکی زانستیی ئۆنلاین لەلایەن مامۆستایانی بەشی ڕۆژهەڵاتناسیی زانکۆی فیدراڵی ئۆڕاڵەوە بۆ خوێندکارانی زانکۆی کوردستان.

• جێبەجێکردنی پڕۆژەی توێژینەوەی هاوبەش لە بوارەکانی زمان و ئەدەبیاتی فارسی و کوردی و کوردستانناسیدا.

• سازکردنی کۆنفرانسی زانستیی نێودەوڵەتیی هاوبەش.

• ڕەخساندنی دەرفەتی توێژینەوەیی بۆ مامۆستایان و خوێندکارانی دکتۆرا، بە دابینکردنی شوێنی نیشتەجێبوون و خۆراکی خۆڕایی لەلایەن زانکۆی میواندارەوە.

• پێکهێنانی پرۆگرامی خوێندنی هاوبەش (Joint Degree Programmes).

• داڕشتنی مۆدێلێکی هاریکاریی سێقۆڵی لە نێوان کەرتی پیشەسازیی ئێران، زانکۆی کوردستان و زانکۆی فیدراڵی ئۆڕاڵ لە بوارەکانی کانزازانیی پێشکەوتوو، ئامێری دیجیتاڵ، بەرهەمهێنانی وزە، تەکنەلۆژیای زانیاری، ژیریی دەستکرد، کیمیا و بیۆتەکنەلۆژیا.

ئەم سەردانە هەنگاوێکی کاریگەرە بۆ بەهێزکردنی پەیوەندییە زانستی و ڕۆشنبیرییەکانی نێوان ئێران و ڕووسیا و هەروەها بۆ بەدیهێنانی ئامانجە ستراتیژییەکانی زانکۆی کوردستان لە بواری بەنێودەوڵەتیکردنی خوێندنی باڵادا.