بەپێی ڕاگەیاندنی بەشی پەیوەندییە گشتییەکانی زانکۆی کوردستان، بەپێی ڕاپۆرتی بەڕێوەبەرایەتیی کاروباری نێودەوڵەتی، ئەنجامە نوێیەکانی ڕیزبەندیی بابەتیی جیهانیی شانگهای (ShanghaiRanking's Global Ranking of Academic Subjects - GRAS) بۆ ساڵی ٢٠٢٥ بڵاو کرایەوە و زانکۆی کوردستان جارێکی دیکە ناوی خۆی لە لیستی نوخبە زانستییەکانی جیهاندا تۆمار کردەوە.

لەسەر بنەمای ئەم هەڵسەنگاندنە، زانکۆی کوردستان لە بواری ئەندازیاریی کارەبا و ئەلیکترۆنیک (Electrical & Electronic Engineering)دا سەرکەوتوو بوو لەوەی لە بازنەی پلەی ٤٠١ بۆ ٥٠٠ لەنێو باشترین زانکۆکانی جیهاندا جێ بگرێت. ئەم دەستکەوتە، زانکۆی کوردستانی لە پلەی چوارەمی نیشتمانیدا لەنێو ئەو زانکۆ ئێرانییانەی لەم ڕیزبەندییە پسپۆڕییەدا ئامادەن، داناوە.

ڕیزبەندیی شانگهای یەکێکە لە باوەڕپێکراوترین سیستەمەکانی هەڵسەنگاندنی ئەکادیمی لە ئاستی جیهاندا کە کارکردی توێژینەوەیی زانکۆکان لەسەر بنەمای پێوەرە وردەکانی وەک کوالێتی و کوانتیتیی وتارە زانستییەکان، ڕێژەی ئاماژەپێدان (citation)، و هاوکارییە نێودەوڵەتییەکان هەڵدەسەنگێنێت.

ئامادەبوونی بەردەوامی زانکۆی کوردستان لەم جۆرە ڕیزبەندییە باوەڕپێکراوانەدا، نیشاندەری پۆتانسیەلی بەرزی توێژینەوەیی، ژێرخانی زانستیی بەهێز و توانای ئەندامانی دەستەی زانستی و توێژەرانی ئەم زانکۆیەیە. ئەم دەستکەوتە بەنرخە، گرنگیی وەبەرهێنانی ستراتیژی لەسەر بوارە توێژینەوەییە سەرەکییەکان زیاتر لە جاران دەخاتە ڕوو و وەک پێوەرێکی گرنگ بۆ پلاندانانی داهاتوو لە پێناو بەرزکردنەوەی پێگەی نێودەوڵەتیی زانکۆدا لەبەرچاو دەگیرێت.