بەپێی ڕاگەیاندنی بەشی پەیوەندییە گشتییەکانی زانکۆی کوردستان، لەم ڕێوڕەسمەدا، تۆحید ڕۆستەمی، فەرماندەی بەسیجی خوێندکاریی پارێزگای کوردستان، وێڕای بەرزڕاگرتنی یادی شەهیدانی خوێندکار و سوپاسگوزاری لە بنەماڵەکانیان، جەختی لەوە کردەوە کە بەسیجی خوێندکاری و مەلاکان یەکێکن لە کۆڵەکە سەرەکییەکانی پاراستنی شۆڕشی ئیسلامی و بەرەنگاربوونەوەی هەڕەشە نەرمەکان.

ڕۆستەمی بە ئاماژەدان بە وتەکانی حەزرەتی ئیمام لە ٢ی سەرماوەزی ٦٧ و پێویستیی دامەزراندنی بەسیج بۆ ڕووبەڕووبوونەوەی ئاستەنگەکانی داهاتووی شۆڕش، زیادی کرد: «بەسیجی خوێندکاری بۆ پاراستنی بنەماکانی شۆڕشی ئیسلامی و بەرەنگاربوونەوەی دوژمنانی دەرەکی و ناوخۆیی هەمیشە ئامادەیە و ئەم ئامادەییەی لە هەموو قەیرانەکاندا، لە بەرگریی پیرۆزەوە تا کارەساتە سروشتییەکانی وەک لافاو و بوومەلەرزە، سەلماندووە.»

لە بەشێکی دیکەی ڕێوڕەسمەکەدا، حوجەتولئیسلام والمسلمین تەوکلی، نوێنەری وەلی فەقیهـ لە سوپای بەیتولموقەدەسی کوردستان، لە وتارێکدا جەختی لەسەر گرنگیی ڕۆڵی خوێندکارانی بەسیجی و مامۆستایانی شۆڕشگێڕ لە پێشخستنی ئامانجەکانی شۆڕشی ئیسلامیدا کردەوە. ناوبراو بە ئاماژەدان بە فێرکارییەکانی ئیمام خومەینی (رە) و ئامانجەکانی بەسیجی خوێندکاری، گوتی: «پێویستە خوێندکارانی بەسیجی لە بوارە زانستی، فەرهەنگی و کۆمەڵایەتییەکاندا پێشەنگ بن و ڕۆڵێکی یەکلاکەرەوە لە ڕوونکردنەوە و بەرزکردنەوەی ئاستی تێگەیشتن لە کۆمەڵگەدا بگێڕن.»

لە درێژەدا، حەسەن عەسگەری، جێگری فەرماندەی سوپای پارێزگای کوردستان، وێڕای بەرزڕاگرتنی یادی شەهیدانی پارێزگای کوردستان و شەهیدانی شۆڕشی ئیسلامی، باسی لە پێگەی بەنرخی شەهیدان و بیری بەسیجی کرد. عەسگەری بە ئاماژەدان بە شەهیدە گومناوەکان، جەختی کردەوە: «شەهیدان بە گیانفیدایی خۆیان ئارامییان بۆ ئێمە هێنا.» ناوبراو پاشان ئاماژەی بە تایبەتمەندییەکانی ئەندامانی بەسیج و بیری بەسیجی کرد و گوتی: «بەسیج قوتابخانەی عەشق، شەهادەت و گومنامییە کە بنەماکانی وەک دڵسۆزی، خۆبەختکردن، پشت بەستن بە خودا و پابەندبوون بە ویلایەت لە ناخی هەر ئەندامێکی بەسیجدا بوونی هەیە.»

لە کۆتاییی ڕێوڕەسمەکەدا، ڕێز لە خزمەتکارانی شەهیدان گیرا و بەشداربووان بە نوێکردنەوەی پەیمان لەگەڵ شەهیدە بەنرخەکان، جەختیان لەسەر سووربوونی خۆیان بۆ درێژەدان بە ڕێگاکەیان کردەوە.